CABO-VERDIANO DI 59 ANU AKUZADU DI MATA UN KRIANSA 31 ANU ATRÁS

... 
Joao Monteiro, tanbé konxedu pa John, foi prezu kuarta-fera di noti pa polisia di sidadi di Pawtucket kuandu ê staba ta sai di si trabadju y na Tribunal Distrital di Providence es kinta-fera ê foi akuzadu di mata Christine Cole, un kriansa di 10 anu ki dizapareseba na sidadi di Pawtucket na Janero di 1988 y ki 54 dias dipos ben atxadu morta na bera mar na Warwick .

Dipos di obi detetive ki investiga kazu Juiz dekreta prizon preventivu pa Joao Monteiro y negal kualker posibilidadi di pága fiansa. ..Si familia ki staba na Tribunal fika spantadu enkuantu si advogado deklara ma Joao Monteiro ta nega tudu akuzason. Ê ta obidu otu bes na Tribunla na prósimu mes di Agosto.

TESTE DE DNA
Di akordu ku polisia foi teste di DNA ki djuda rezolvi es kazu 31 anu dipos di okorénsia.
Kazu na rialidadi dja staba arkivadu, mas na pasadu mes di Agosto ben sabedu ma DNA di un joven ki staba prezu kuazi ta koinsidiba ku DNA ki atxadu na ropa di es kriansa morta .. . Komu na altura di es krimi es joven prezu nen seker inda ka naseba , polisia volta enton pa si pai ( Joao Monteiro) ki na altura ta moraba justamenti pa riba di mersearia undi es kriansa bai kunpraba leti y undi ê odjadu pa ultimu bes. Dipos di algun diligénsia autoridades iziji di João Monteiro un testi di DNA y di akordu ku polisia rezultadu di teste foi konkluzivu ( DNA di Joao Monteiro ta koinsidi ku DNA ki atxadu na ropa di Chistine Cole)

Polisia tanbé ta akredita ma Joao Monteiro ka tinha ninhun linhun ligason ku es kriansa ki es ta fla ma so staba na lugar erradu na hora erradu. Es ka avansa ninhun motivu nen es ka fla kual ki foi kirkustansia di es trajédia. So es avansa ma Joao Monteiro duranti es 31 anu muda di rezidensia + di 18 bes y ma ê tinha un konportamentu altamenti dismuladu , enbora ê tevi uns 3 pasagen pa Tribunal por konduson sob efeito di alkool y violensia domestika ( dados di Tribunal di Familia ta mostra ma e divorsia di si mudjer na 2003).
Joao Monteiro nasi na 1960. Na altura ki kontisi es krimi ê tinha 28 ano.

OndaKriolu