MI KU PEDRA KU MAR - Poema de Antonio Ribeiro

U'n sta tal kumá solidan d'ês pedra

Sakedu nà'reia ta spia maré ku bentu

Ku friu mi sô tanda nà bera mar

Ben un onda altu di mancinhu

Modja  kêl pedra ku amor i karinhu

Mâ ku sopru di bentu ondas bira

Ta fazê kada b'ês mâ's forti

Ta ben dumina'l kêl ta kubri'l

Ta pussui imovel paradu êl kâ fra'l nàu

Êl kâ fra sin êl dixa'l dá'l banhu

Êl ama mar ku tudu karinhu

Ami ê kêl pedra abô ê nhá mar

N'kâten duminiu pâ ês grandi mar

Apenas êl ta dixá'n toma banhu

U'n sta tal kumá solidan d'ês pedra

Sintadu nà'reia ta spia maré

U'n ôdjá un onda ta ben di mancinhu

U'n fika ta spia'l tokê'l ben modja'l

Kêl pedra ku amor i karinhu

U'n leía nà sodadi ku àgu nà ôdju

U'n brasa nhá petu ku sodadi

U'n buska-bu nà lenbránsa ku karinhu

U'n vivê nôs passadu brasadu nà sodadi

Skordadu u'n fika ta sunha ku bô.

                      Antonio Ribeiro

                      Totoi di Gunai

                        05.02.2023