VIDA Y OBRA DI UN KRIOLU...

Komu ê pása 32 anu ta trabadja na naviu merkanti José Domingos Lopes da mundu volta 9 bes , mas foi na Malta y na India undi ê inspira pa kostrui es “kaza di sonhu” na Nossa Senhora do Monte ...

Na Djabraba ta fladu ma “Djou” konstrui di simentu tudu mobilia di es kaza so pa ka da si mudjer trabadju di karrega, mas na rialidadi foi so alguns meza ku divan ki ê fazi di simentu pamodi simentu ta dura +

José Domingos Lopes, Jose di Sivera ou simplismenti Djou sima ê ta txomadu na Brava morri es sábado di duensa pa alén di es bunitu “kastelu” ê dexa un storia kumpridu ki ta da pa skrebi un livro.

IMIGRASON PA MERKA...

José Domingos nasi na Brava na 1937.

Di si infansia so ê guarda kes imagens di seka y di fomi ki na dekada di 40/50 di seklu pasadu dizima milharis di kabu-verdianos...Pa fuji di es distinu trájiku José Domingos imigra pa Merka ku 17 anu d’idadi “pa trabadja pa djuda familia”...Na Merka ê lista na tropa y duranti si tempu di servisu militar ê pruveita pa studa pa kompleta Liceu.

Nun Merka markadu pa rasismu y konflitu sosial ki ê ta flaba ma ê xinti na peli, es kabu-verdianu sabia ma so ku studu y edukason ê ki ê podia subi na vida ....

Dipos di tropa komu ê ranja trabadju ma barku y foi enton ki e kumesa ta studa engenharia naval ti ki un dia ê konsigi postu di xefi di mákina...

Jose Domingos pasa 47 anu na Merka mas nunka ê ka skesi di si ilha ki fika pa tras ( ê djuda uns 40 familia a imigra pa Merka).

24 ANU Y MEIO MILHON DI DÓLA PA KONSTRUI UN IATI

Na 2003 José Domingos, ku si 64 anu, atravessa atlantico di Merka pa Cabo Verde na si naviu a vela “Senhora do Monte” ki ê kostrui ku si mo dianti di si kaza na sidadi di New Bedford ( preparativu pa es viagen foi filmadu y dipos transmitidu na televizon publiku di New Bedford ku titulo “ Romance with the Sea” )

Pa kostrui es barku enkuantu ê ta trabadjaba na mar komu marinheru Josê Domingos leba 24 anu y ê gasta meio milhon di dola. Na 2003 finalmenti ê pol na mar y nun tempu rekordi di 5 semanas ê staba na Cabo Verde djuntu ku si amigos Teofilo ku Dany Furtado y kubanu Manuel Palomo.

“Nossa Senhora do Monte” bai fundu na Fajã d’Agua na 2009 mas duranti kes 6 anu ki ê stevi riba d’agu ã sokorri txeu doentis di Brava pa leba Fogo.

Onda Kriolu